ظنت أنها مجرد أعراض للعصب الحائر! كيف أنقذ "هولتر 48 ساعة" ثمانينية من السدة الكهربية؟
اتبسطت جدا لما عرفت إن في ناس كتير أعمارهم فوق الـ ٧٠ و الـ ٨٠ متابعين منشوراتي على فيس بوك.
منهم سيدة فاضلة على مشارف الـ ٨٠ جات لي العيادة من فترة قريبة و قالت لي إنها بتستفيد جداً من المنشورات و بتقرأ كلامي عن العصب الحائر بشغف و اهتمام لا سيما إنها بقالها شهرين بتشتكي من أعراض مشابهة للأعراض اللي أنا بكتبها عن العصب الحائر :
دوخة - هبوط - صداع - غثيان - ضيق تنفس - خفقان
فحصت المريضة و عملت لها رسم قلب و إيكو ؛ لاقيت كل حاجة كويسة.
قالت لي:- هتطلب لي اختبار المنضدة المائلة يا دكتور ؟
قلت لها:- لا ؛ هطلب من حضرتك فحص تاني اسمه ( هولتر ٤٨ ساعة )
قالت لي :- ليه ؟ مش دي أعراض العصب الحائر و اختبار المنضدة هو اللي بيشخص المشكلة دي ؟
قلت لها :- الأعراض متشابهة مع أعراض العصب الحائر فعلاً لكن لما الأعراض دي تكون عند مريض في العشرينات مثلا غير لما تكون عند مريض في الثمانينات.
بمعنى إن الأعراض قد يكون لها أسباب معينة في المرضى صغار السن و نفس الأعراض قد يكون لها أسباب أخرى تماماً في كبار السن.
سألتني المريضة : طيب و عندي أنا السبب ممكن يكون إيه ؟
قلت لها :- هطلب من حضرتك بعض التحاليل الروتينية و دوبلر على شرايين الرقبة عشان نطمن على الشرايين المسئولة عن التروية الدماغية و رنين مغناطيسي على المخ و فحص مهم جداً اسمه هولتر ٤٨ ساعة.
سألتني:- إيه هو فحص الهولتر ٤٨ ساعة ؟
قلت لها : ده عبارة عن جهاز صغير هنثبته ببلاستر على الصدر من برة و وظيفته إنه يراقب ضربات القلب على مدى يومين للتأكد من عدم وجود خلل كهربي في القلب و أخطرهم بالنسبة للمرحلة السنية بتاعة حضرتك هو السدة الكهربية لانها بتسبب أعراض مشابهة جداً للي حضرتك بتشتكي منها.
بالفعل المريضة عملت كل الفحوصات اللازمة و جات لي الاستشارة و كل فحوصاتها تمام باستثناء فحص الهولتر اللي أكد إن المريضة بتدخل في نوبات متكررة من السدة الكهربية المتقدمة المصاحبة بتباطؤ شديد في الضربات و ده معناه إن المريضة تحتاج بشكل عاجل إلى تركيب منظم كهربي للقلب.
إديت للمريضة تحويل على التأمين الصحي بتاعها و بالفعل راحت و الأطباء هناك مشكورين اتطلعوا على كل الأوراق و الفحوصات و قرروا فعلا تركيب منظم كهربي ثنائي دائم للقلب.
و الحمد لله المريضة جات لي بعدها و كل الأعراض اللي بتشتكي منها اختفت تماماً.
الخلاصة …
مفيش قص و لزق في الطب ؛ نفس الأعراض قد يكون لها اسباب متعددة حسب المرحلة السنية و الأمراض المزمنة المصاحبة لشكوة المريض.
Aisha Aly
احدث المقالات
